Ата Заң – әділеттіліктің айнасы
Президент Тоқаев 1993 жылғы алғашқы Конституция мен 1995 жылғы жаңа Ата заңының қабылдануын талдай отырып, еліміздің құқықтық жүйесінің эволюциясын көрсетеді. Ол Конституцияның елдің тәуелсіздігі мен жаңа саяси жүйесінің негізін қалап, жаңа конституциялық құрылымның пайда болғанын айтады. Конституцияның алғашқы жобасын қабылдау, оны қайтадан жаңарту қажеттілігі – мемлекеттің құқықтық жүйесінің өзгерістерге икемді екенін дәлелдейді. Жаңа Конституцияның қабылдануы мен оны жасаудағы Назарбаевтың рөлін Президент ерекше атап өтті. Назарбаевтың саясаткер ретінде конституциялық реформаларды дұрыс әрі уақытында жүзеге асырғанын айту арқылы Тоқаев оның тарихтағы орны мен көшбасшылық рөлін бағалаған. Конституцияның алғашқы жобасы, оның қабылдануы Қазақстанның демократиялық жүйесін орнықтырудың алғашқы қадамы болды. Осы құжаттың Қазақстан үшін тарихи маңызы зор, себебі ол халықтың өзін-өзі басқару құқығын, саяси еркіндігін нығайтуға бағытталды.
Президент атап өткендей, Конституцияның қабылдануына тек заңгерлер емес, бүкіл қоғам өкілдері қатысты, бұл процестің халықтық сипатын көрсетеді. Бұл өзгерістер заң шығарушы органдардың халықпен тікелей байланысын, қоғамның құқығын сақтау мен құрметтеу қағидаларын негіздеуге мүмкіндік берді. Конституцияның қабылдануы тек құқықтық құжаттың ендірілуі ғана емес, елдің жаңа саяси бағытын айқындап, мемлекеттің құқықтық мәдениетін қалыптастыру болды. Президент сөзінде тарихи кезеңдердің өзара байланысын көрсетіп, Қазақстанның дамуындағы маңызды кезеңдерге ерекше назар аударды.
Рахиев Роман, Қазақстан халқы Ассамблеясы жанындағы Ақсақалдар кеңесінің төрағасы