Президент өңірлердің экономикалық өсуінің жаңа бағыттарын ашуды және өңірлік дамудағы теңгерімсіздіктерді жоюды мемлекеттің басты міндеті деп атады. Осы мақсатта экономиканың нақты секторын қаржыландыру көлемі ұлғайтылып, алдағы төрт жылда елде жыл сайын 200-ге жуық инвестициялық жоба іске қосылады.
Мемлекет әлеуметтік тұрғыдан осал санаттағы азаматтарды, ерекше балаларды қолдауға ерекше назар аударады. Өткен жылы олар үшін 21 мыңға жуық пәтер сатып алынып берілді, еліміздің бірқатар қалаларында заманауи оңалту орталықтары салынды.
Ұлт денсаулығы – мемлекеттің тұрақты дамуының маңызды факторы. «Ауылда денсаулық сақтауды жаңғырту» жобасы аясында жыл соңына дейін 188 медициналық нысан салу жоспарлануда. 2026 жылы 32 орталық аудандық аурухана жаңғыртылады.
Президент ел азаматтарын жетілген ұлт болуға, өз күштеріне сүйенуге және Қазақстанды кез келген сын-қатерге төтеп бере алатын мықты мемлекетке айналдыруға шақырды. Қуатты, Қауіпсіз, Әділ әрі Таза Қазақстанды құруға әрқайсымыз атсалысуымыз керек!
Майра Балқыбаева, AMANAT партиясы Хромтау аудандық филиалының атқарушы хатшысы