Бурабайда өткен Ұлттық құрылтай отырысында Мемлекет Басшысы Қасым-Жомарт Тоқаев еліміздегі саяси реформалар жөнінде сөз қозғай отырып, мәдениет, оның ішінде кино саласына ерекше тоқталды.

Президент өз сөзінде: «Қазіргі уақытта кинотеатрларда көрсетілетін фильмдерге қатысты қоғамда сын-пікірлер жиі айтылып жүр. Өткен жылы қазақстандық мамандар түсірген 94 фильм жарыққа шықты. Бұл – оң үрдіс. Дегенмен, біз саннан бұрын сапаға назар аударуымыз керек. Көрерменге көтеріңкі көңіл-күй сыйлау мен теріс әдеттерді насихаттау – екі бөлек дүние. Өкінішке қарай, соңғы уақытта зорлық-зомбылықты, қатыгездік пен қылмысты насихаттайтын фильмдер де түсіріле бастады. Мұндай жағдайға бей-жай қарауға болмайды.
Қазіргі таңда фильмдердің басым бөлігі мемлекеттік тапсырыс аясында емес, жеке қаражат есебінен түсірілуде. Дегенмен, кино – аса маңызды идеологиялық құрал. Сондықтан, қандай қаржыландыру көзінен түсірілсе де, кинотеатрларда көрсетілетін фильмдерді алдын ала сүзгіден өткізу тетіктерін қарастыру қажет», – деп атап өтті.

Мемлекет Басшысының бұл мәселеге назар аударып, нақты тапсырмалар жүктегенін көріп, қуанып отырмын. Өйткені, бұл – қоғам үшін өзекті тақырып. Бүгінгі жас ұрпақ көгілдір экраннан көрген дүниеден тәлім алып өсетінін ескерсек, ұлттық құндылықтар мен дұрыс идеологияны дәріптейтін сапалы контент қалыптастыру аса маңызды.

Ашабаев Болат Бұзаубай
Мәдениет саласының ардагері