Қолжетімді интернет
Облыста жыл соңына дейін 40-қа жуық ауыл мобильді интернетке қосылады. Қазіргі уақытта желіге сегіз елді мекен қосылған. Тағы сегізінде жабдықтар монтаждалуда, осы ауылдардың тұрғындарын қараша айында мобильді интернетпен қамтамасыз ету жоспарланып отыр. 22 ауылда инфрақұрылымды дайындау жұмыстары жүргізіліп жатыр.
40-қа жуық ауыл мобильді интернетке қосылған кезде онымен қамту көрсеткіші ауыл халқының жалпы санының 98 пайызын құрайды. Келесі жылы 100-ден астам тұрғыны бар тоғыз ауылдың инфрақұрылымы жүргізіліп, мобильді интернет қосылады.
Облыстық цифрлық технологиялар басқармасының басшысы Әсет Отарбаев республикалық жолдарды байланыспен қамтамасыз ету туралы да хабардар етті. «Қолжетімді интернет» ұлттық жобасы аясында республикалық трассалардағы 17 нүктеде антенна-діңгек құрылыстарын салуға жобалық-сметалық құжат әзірленуде.
Облыстағы жалпы ұзындығы 3 158 шақырым автожолдың2 457 шақырымында 2G желісінің қамту аймағы және 1743 шақырымында 4G стандартының мобильді байланысы қолжетімді болады. Бүгінгі таңда интернетпен Самара-Шымкент (521-571 км) республикалық маңызы бар трасса учаскесі қамтамасыз етілген. Сондай-ақАқтөбе-Орск (51-69 км) учаскесі бойынша жұмыстар жүргізілуде.
Асхат Шахаров антенна-діңгек құрылыстары бойынша сараптамадан өту процесін кешіктірмеуді және аймақтағы байланыс жағдайын егжей-тегжейлі зерттеп, жергілікті тұрғындардың қажеттіліктерін анықтауды тапсырды.
«Біздің ауылдарды сапалы интернет және ұялы байланыспен қамтамасыз ету— өте маңызды мәселе. Цифрлық даму министрлігімен шалғай ауылдарда байланысты дамытуға бағытталған бағдарламаларды қаржыландыру мәселесін тағы да талқылау керек. Бұдан өзге бірлескен жобаларды жүргізу үшін жергілікті мобильді операторлармен жұмысты ұйымдастыру қажет. Шалғай ауылдар үшін тиімдірек болуы мүмкін спутниктік интернет немесе сымсыз желілер сияқты балама технологияларды енгізуді қарастыруға болады»,— деді аймақ басшысы.
А.МҰҚАШЕВА